Mera Manana Hain Ek Samaaj,
Jo Lakwagrasth Tha, Aur Hain,
Unhe Baisakhiyon Ka Sahara,
To Chahiye Hi Tha, Wo Jaruri Tha…
Lekin Uske Sharir Ke Kondh,
We Wo Baddhe Dagh, Jinn Ki Wajah,
Se Tumne Ussey Kothri Main Band Rakha,
Aur Samaaj Ke Har Bandish Main Ussey Dabay Rakha…
Yeh Keval Uss Akele Abhagey Ki Nahi,
Balki Uss Jaise Karodo Abhagon Ki,
Ansuni Kahani Hain, Jo Bata Raha Hun,
Tumhari Soi Atma Ko Jaga Raha Hun…
Yahan Yeh Bhi Kehna Chahunga Main Dubara,
Yeh Keval Ek Janm Ki Nahi,
Balki Janm Janmantaro Se Ho Rahi,
Hazaron Saalon Ki Kahani Hain…
Kahani Bhi Aisi Jo Upekshaon Se Bhari,
Shoshan Se Tari, Atyacharon Se Bhari,
Tano Se Mari, Bhuk Se Pratadhit,
Pyas Se Vyakul, Aur Cheez Se Vanchit…
Kabhi Koshish Hi Nahi Ki,
Meri Apekshaon Ko Janne Ki Tumne,
Tanik Ruk Kar Yadi Tumne, Le Li Hoti Meri Ratti Bhar Sudh,
Toh Aaj Na Hoti Lachar Meri Soch…
Meri Soch Abh Soi Nahi,
Meri Soch Toh Abh Mrit Hain,
Samajhte Ho Iska Matlab?
Nahin! Varna Aaj Tum Pehle Chuvachut Ko Mrit Karte…
Hazaron Varsho Se Bade Hi Yatn Karke,
Mere Andar Tumne Sabh Maara,
Aur Phir Mere Mrit Shrir Ko Tumne,
Kohlu Ke Thonthe Par Bandha…
Wahin Ghuma Ghuma Kar Tumne,
Zanjiro Main Jakadhkar Mujhe Das Banaya,
Aur Mere Mann Mashtikshya Par Bus,
Jadhta Ka Hi Rang Chadaya…
Tumhara Bus Chalta To Aaj,
Keval Manusmriti Ka Raaj Hota,
Aur Janm Janmantaro Ka Khel,
Na Jane Kitne Janm Aur Chalta…
Lekin Tumhari Chalein Toh Abh,
Pehle Se Bhi Tejh Ho Chalin Hain,
Aur Kanoon Ke Dhanv Pench Main,
Meri Aas Ko Maar Rahi Hain…
Main Samajh Raha Hun Thoda Thoda,
Lekin Darr Raha Hun Punchne Mein,
Lekin Tumne Pehle Bhi Yahi Kiya Tha,
Aur Abh Bhi Tum Vahi Kar Rahe Ho…
By – Prakash Awaaz
(This Hindi Poem is dedicated for Dalit Samaj. This Hindi Poem is
telling about the inner feelings of Dalit Samaaj. We all need to understand
that feelings and aspirations of Dalit Samaaj needs to be understood
differently. Then, only gradually they would become part of national
mainstream.)